2025 жылғы 27 қарашада Балалар құқығын қорғау күніне орайластырылған Психологиялық қолдау апталығы тұжырымдамасы аясында студенттер үшін «Биіктікке бастар жол — кейіпкермен диалог» атты диалог алаңы ұйымдастырылды. Іс-шараның негізгі мақсаты – жастарды тұлғалық және кәсіби өсу тарихымен таныстыру, өмірлік қиындықтарды жеңу үлгісін көрсету және студенттерде табандылық, ішкі тұрақтылық пен өз күшіне сенуді қалыптастыру болды.

Кездесудің құрметті қонағы – жеңіл атлетика бойынша халықаралық дәрежедегі спорт шебері, Азияның 21 дүркін чемпионы, әлемнің 6 дүркін чемпионы және Дүниежүзілік ойындардың 3 дүркін жеңімпазы Сергей Николаевич Поликарпов болды. Оның спорттық жолы табандылық, еңбекқорлық және өз ісіне адалдық үлкен жетістіктерге жеткізетінін айқын дәлелдейді.

Әңгіме барысында Сергей Николаевич студенттерге өзінің кәсіби қалыптасу жолы туралы айтып берді: спорттағы алғашқы қадамдары, күрделі жаттығу кезеңдері, үлкен жеңістерге жету жолында кездескен кедергілер жөнінде бөлісті. Ол мотивацияны қалай сақтап қалу, қиын сәттерде күш-қуатты қайдан табу және неге биік мақсаттар қоюдан қорықпау керектігі туралы құнды ойларымен бөлісті.

Қонақ спортшының психологиялық тұрақтылық мәселесіне ерекше тоқталып, эмоцияларды басқара білу, жүктемені дұрыс тарату және ішкі тепе-теңдікті сақтау тек спортта ғана емес, өмірдің кез келген саласында табысқа жетудің маңызды факторы екенін атап өтті.

Студенттер белсенді түрде сұрақтар қойып, жарысқа дайындық, жаттығу тәртібі, шабыт көздері және болашақ жоспарлары туралы қызығушылық танытты. Кездесу жылы әрі жігерлендіретін атмосферада өтті, ал Сергей Николаевичтің шынайы жауаптары көптеген студенттерге маңызды ақыл-кеңес пен жаңа серпін берді.

Іс-шара спортшыға алғыс айтумен және алынған тәжірибені оқу мен кәсіби қызметте қалай қолдануға болатынын талқылаумен аяқталды. «Биіктікке бастар жол» диалог алаңы Психологиялық қолдау апталығының маңызды оқиғасына айналып, студенттерге жарқын әсер мен зор шабыт сыйлады.